Testside Frådeling av eigedom

For å søke om frådeling må du vere eigar av eigedomen, eller ha skriftleg fullmakt frå eigaren. 

Dersom du får løyve til frådeling, får du:

• ein ny sjølvstendig eigedom med eige gards- og bruksnummer
• målt opp dei nye grensene, og sett ned offentlege grensemerke 
• registrert den nye eigedomen i det offentlege eigedomsregisteret, matrikkelen
•  tinglyst eigedomen

Vi tilrår at du gjennomfører søknadsprosessen i seks steg:

1. Start utfylling av digitalt søknadsskjema.
2. Undersøk om frådelinga er i samsvar med reguleringsplanen for området og/eller retningslinjene i arealdelen i kommuneplanen. 
3. Lag til kart som viser endringane du ynskjer å gjere.
4. Send nabovarsel.
5. Vent til at fristen naboane har til å kome med merknader er ute, 14 dagar.
6. Fullfør utfylling, og send inn det digitale søknadsskjemaet med minst to vedlegg: kart og dokumentasjon knytt til nabovarsling.

Du kan bruke det digitale søknadsskjemaet (pålogging med ID-porten) til å gjere det som trengst i samband med frådeling.

• Vi forklarer ord og uttrykk undervegs.
• Vi sender deg til andre sider ved behov.
• Vi legg til rette for at du kan laste opp dokumentasjon etter kvart.

Du kan lagre skjemaet undervegs. Når du skal halde fram med utfylling seinare, finn du att skjemaet under “Mine skjemaer” etter at du har logga inn. 

Dispensasjon er å gjere unntak frå ein regel, eller ein bestemmelse. 

Kommunstyret vedtek planar som gir rammer for korleis geografiske område i kommunen kan brukast. Slik legg kommunen til rette for ei samordning av offentlege, almenne og private interesser. I tillegg må plan- og bygningslova, og nokre gongar jordlova, takast omsyn til når du vil gjere endringar med eigedomen din.

Du må difor undersøke om endringane er i samsvar med: 

• plan- og bygninglova
•  reguleringsplanen for området
• retningslinjene i arealdelen i kommuneplanen.
• jordlova (dersom det er aktuelt) 

Dersom endringane du vil gjere strir mot bestemmelsar i lov- og/eller planverk, kan du søke om dispensasjon.  Dei mest vanlege ynskja om dispensasjon i Gloppen er knytt til søknad om frådeling av bustad- eller hyttetomt i areal som er avsett til landbruks-, natur- og friluftsområde i kommuneplanen. 

Vurdering av søknad                            

Når vi skal vurdere søknaden om dispensasjon, må vi særleg legge vekt på:

• at fordelane for alt og alle som vert påverka av unntaket er større enn ulempene
• at meininga med regelen/bestemmelsen det vert gjort unntak frå er teken omsyn til
• at statlege, regionale og kommunale mål vert følgde

Vanlege dispensasjonssøknader i Gloppen

I vår kommune er det vanleg å ønskje dispensasjon frå kommuneplanen fordi ein vil ha bustad- eller hyttetomt på areal som er sett av til landbruks-, natur- og friluftsområde. 

Du kan søke om dispensasjon i det same digitale søknadsskjemaet som du brukar til å søke om frådeling.

Kart er nyttig for å vise korleis du vil dele eigedomen din.

Eit kart hjelper både oss og naboane dine til å forstå kva du ynskjer å gjere. Kartet skal difor ligge ved både nabovarsel og digitalt søknadsskjema.

Du kan bruke digitalt kart og teikne inn endringane du vil gjere. Du kan også bestille utskrift av kart på servicetorget. 

Kartet bør vere i målestokk 1:500.

Kartet skal vise:

• grensene til dagens eigedom
• grensene til ny eigedom
• gards- og bruksnummer
• arealet du søker om å frådele

Nabovarsling

Når du har planar om å gjere noko på eigedomen din som kan påverke naboane dine, må du sende nabovarsel. Etter at du har sendt varselet har naboane 14 dagar til å uttale seg skriftleg til deg.

Det er ulike måtar å sende nabovarsel på:

• digitalt skjema via e-torg
• personleg
• SMS/e-post
• rekommandert i posten

1. Vi vurderer søknaden

Vi vurderer søknaden etter plan- og bygningslova og nokre gongar jordlova. Du får skriftleg svar i posten når vi har avgjort saka. Vanlegvis går det mellom to og fire veker frå du har søkt til du får svar.

Nokre gongar kan vi trenge meir tid til å vurdere søknaden. Det kan skje:

• dersom noko er uklart, feil eller manglar i søknaden. Då tek vi kontakt med deg så raskt vi kan.
• viss andre offentlege instansar må uttale seg om saka
• når du treng dispensasjon frå kommunen sin arealplan/reguleringsplan

Dersom du får avslag på søknaden kan du klage innan tre veker.  Blir søknaden godkjent, går vi vidare i prosessen. 

2. Måling og merking av nye eigedomsgrenser (oppmålingsforretning)

Dersom du får løyve til frådeling, måler ein av kommunen sine landmålarar opp grensene til eigedomen og set ned grensemerke. Dette blir kalla oppmålingforretning. Du som eigar blir invitert til å vere med, slik at vi er einige om kvar grensene skal gå. Vi sender brev til deg med tidspunkt for oppmålingsforretninga. 

Sesongen for oppmåling og merking er i hovudsak mellom 1. mai og 31. oktober. Då er det sjeldan snø, og det er praktisk mogeleg å sette ned grensemerke. Dersom vêret tillet det, kan oppmålingsforretninga haldast utanfor sesongen. Fristen for oppmåling er tre år etter at søknaden er godkjent. 

3. Matrikulering

Etter oppmålingsforretninga registrerer vi opplysningar om den nye eigedomen i matrikkelen. Det er Norge sitt offisielle register over fast eigedom. Du får matrikkelbrev i posten som viser kva for opplysningar som er registrert om eigedomen.

4. Tinglysing

Når eigedomen er ført inn i matrikkelen, sender vi tinglysing på vegner av deg til Statens kartverk. Då vert eigedomen ført inn i grunnboka, som er landet sitt offisielle register over rettar knytt til fast eigedom.

Det er to gebyr knytt til frådeling av eigedom:

1. Gebyr for sakshandsaming 
2. Gebyr for oppmålingsforrretning (oppmåling og matrikulering)

Vi sender to fakturaer, ein etter at saka er ferdig handsama og ein etter at oppmålingsforretninga er gjennomført. 

Den totale kostnaden vil variere alt etter kva for type frådeling det er snakk om. 

Du kan lese meir om kostander på sida Avgifter og prisar

Det vil variere kor lang tid det tek til saka di er ferdig alt etter kor kompleks ho er. 

(Meir)

• Plan- og bygningslova (Lov om planlegging og byggesaksbehandling) 
• Jordlova (Lov om jord)
• Matrikkellova (Lov om eigedomsregistrering) 
• Matrikkelforskrifta (Forskrift om eigedomsregistrering) 

Nokre saker er kompliserte. Då kan det vere nyttig å snakke med oss før du søker om frådeling. Vi kan gje ei førehandsvurdering av om eigedomen kan delast.

Kontaktperson i kommunen er avdelingsingeniør Bjørn Aurlien.

 Telefon: 979 91 054

 E-post: bjorn.aurlien@gloppen.kommune.no