Om Hyen skule

Hyen skule er ein barne- og ungdomsskule plassert midt i bygda. Skulen er eit naturleg møtepunkt også i fritida.

Hausten 2025 flyttar vi inn i eit heilt nytt bygg i to etasjar. Den blir delt inn i 4 avdelingar med småskuletrinn, mellomtrinn, ungdomsskuletrinn og læraravdeling. Kvart trinn har to klasserom og fleksible løysingar for små og store grupper. Det vert spesialrom for naturfag og sløyd i tillegg til skulekjøkken. Vi får og eit stort uteområde som vi kan ta i bruk. Skulen har ei kunstgrasbane til bruk i friminutt og i tillegg gymsal og basseng i eige idrettsbygg.

Vi er ein fådelt skule med fokus på fellesaktivitetar på tvers av klassar og alder. Vi har fokus på å sjå den enkelte og er tett på elevane i kvardagen. 

Satsing

Den grunnleggande lese- og skriveopplæringa er stadig i utvikling og alle lærarar på småskulen får derfor kursing i temaet dette skuleåret. Eit av fokusa er verdien av å kunne skrive seg til lesing.

Vi ser mykje læring i frileik, og kvar skuledag startar med leik for dei yngste. I tillegg har vi uteskule for 1.-4.klasse der vi nyttar nærområda. Barnehagen ligg rett ved skulen og vi har mange kontaktpunkt i løpet av skuleåret.