Barnehagemynde

Lov 17. juni 2005 nr. 64 om barnehagar (barnehagelova) ligg til grunn for barnehagemynde si utøving av mynde. Kommunen er lokal barnehagemynde, og skal sjå til at barnehagane vert drivne i samsvar med regelverket. Barnehagelova gjeld for kommunale og for private barnehageeigarar.

Barnehagemynde har som oppgåve å fatte vedtak om godkjenning av barnehagar,

Handsame søknadar om dispensasjonar og finansiere private barnehagar. I tillegg kjem andre oppgåver som følgje av barnehagelova med forskrifter. 

Barnehagemyndigheita kan påleggje barnehagar  å rette opp forhold som er ulovlege eller uforsvarlege. Eit slikt pålegg skal vere ei tryggleik for barna og sikre at også forhold som ikkje er direkte omtala i barnehagelova, men som kan skape uforsvarlege situasjonar for barna si trivsel, leik, læring og utvikling, blir fanga opp og retta.

For å sikre at regelverk vert følgt må barnehagemynde vurdere risiko for brot på barnehagelova med forskrifter. 

Du kan lese meir om kommunen si rolle som barnehagemynde her: 

Kommunens rolle som barnehagemynde, Udir

Lov om barnehagar (barnehagelova)

Kommunen har ansvar for å føre tilsyn med og gje rettleiing til alle barnehagane i kommunen, både kommunale og private. Kommunen skal sjå til at barnehagane følgjer barnehagelova med forskrifter, også dei barnehagane kommunen eig sjølv. For å sikre rettferd og tillit til arbeidet er rolla som barnehageeigar skilt frå rolla som fører tilsyn. 

Tilsyn kan gjennomførast ved å be om skriftleg dokumentasjon eller ved å besøke barnehagen. Det er ikkje fastsett i lova kor ofte eller korleis tilsyn skal gjerast, så kommunen vurderer dette etter behov. 

Ansvarsområdet til barnehagemyndigheita er avgrensa til å føre tilsyn etter barnehagelova. Dersom det blir oppdaga brot på andre lover eller forskrifter, skal dette meldast vidare til rette instans. 

Barnehagelova skil tydeleg mellom ansvaret til barnehageeigaren og ansvaret kommunen har som barnehagemynde. Eigar har sjølv ansvar for at regelverket blir følgt i eigen barnehage. Kommunen har ansvar for å kontrollere at alle barnehagar blir drivne i tråd med lova. 

Å sjå til at regelverket blir følgt inneber at kommunen vurderer risiko for brot på barnehagelova og bruker dei verkemidla ein har for å sikre at praksisen i barnehagane er i samsvar med regelverket.

Tilsyn med barnehagar, Udir 

Det skal vere minimum ein pedagogisk leiar pr 14 barn, når barna er over 3 år. Når barna er under 3 år skal det vere minimum ein pedagogisk leiar pr 7 barn. Barna vert rekna som over 3 år frå august det året dei fyller 3 år. 

Norma gjeld på barnehagenivå og ein skal difor ta utgangspunkt i det totale tal barn i barnehagen, og ikkje på den einskilde avdeling eller gruppe. Det er tal barn som er grunnlaget, og ikkje tal plassar. Det vil sei at to barn som kvar har 50 prosent plass tel som 2 barn i pedagognorma, sjølv om dei ikkje er i barnehagen samstundes. 

Mellombels dispensasjon frå pedagognorma kan bli gitt for inntil eitt år om gongen, dersom særlege omsyn talar for det. Særlege omsyn skal i det konkrete tilfelle det vert søkt om dispensasjon for, vere til barna sitt beste i den barnehagen det vert søkt for. Kommunen må gjere ei konkret vurdering ved kvart einskild tilfelle.

Barnehageeigar kan legge ved uttale frå barnehagen sitt samarbeidsutval i søknaden.

For meir informasjon ta kontakt med  Gloppen kommune ved Grete Aa Sandal

Her søkjer du

Barnehagen skal ha minst ein arbeidstakar pr. tre barn når barna er under tre år. Når barna er over tre år skal det vere ein arbeidstakar pr seks barn. Barn vert rekna for å vere over tre år frå og med august det året dei fyller tre år. 

Ved grunnbemanning kan ein rekne med prosentvise stillingar. Det vil sei at eit ekstra barn ikkje utløyser krav til ny heiltidsstilling. Eit barn under tre år utløyser behov for 0,33 årsverk, og eit ekstra barn over tre år utløyser 0,17 årsverk. 

På lik linje som for pedagognorma, skal barnehagen som heilskap fylle kravet til grunnbemanning. Vilkåra om at det må ligge til grunn særlege omsyn, betyr at det berre unntaksvis er høve til å gje dispensasjon. Kommunen vil foreta ei konkret vurdering av om barnehageeigar gjer ein reell innsats for å skaffe kvalifisert personale. Kommunen vil samstundes vurdere om barnehagen har tilstrekkeleg personale til å drive ei tilfredsstillande pedagogisk verksemd i den perioden det vert søkt dispensasjon for. Dette vil mellom anna avhenge av alder på barna og opphaldstid. Samt den samla kompetansen til bemanninga. Kommunen må foreta ei konkret vurdering i kvart einskild tilfelle.

For meir informasjon ta kontakt med  Gloppen kommune ved Grete Aa Sandal

Her søkjer du

Det er kommunen som sit med hovudansvaret for at det blir etablert barnehagar som oppfyller krava i regelverket, og som sikrar barna eit likeverdig pedagogisk tilbod. 

Barnehagar skal vere godkjende av kommunen før verksemda kan starte. 

Godkjenningsordninga skal sikre at det vert etablert gode barnehagar. Kommunen skal i etableringsfasen sjå til at barnehagelova sine krav vert følgt, og at det blir lagt opp til ei forsvarleg verksemd. 

Dersom ein godkjent barnehage gjer endringar av eit visst omfang, må barnehageeigar melde dette til Gloppen kommune som barnehagemynde.

For meir informasjon ta kontakt med  Gloppen kommune ved Grete Aa Sandal

Her søkjer du

Som barnehagemynde har kommunen ansvar for godkjenning, tilsyn og rettleiing av barnehagar for å sjå til at barnehagane føl regelverket. Ansvaret gjeld for kommunale og private barnehagar. 

I merknad til barnehagelova § 10, barnehagemynde sitt ansvar, står følgjande: 
Kommunen skal ved godkjenninga, og gjennom aktiv rettleiing og tilsyn, sjå til at barnehagane i kommunen blir driven i tråd med dei krava som er fastsett i barnehagelova med tilhøyrande forskrifter.

Aktiv og god rettleiing er eit viktig verkemiddel for å ha gode barnehagar, samt for å ha effektiv etablering og drift. 

For Gloppen kommune betyr dette å arbeide aktivt inn mot barnehagane, samt at ein har eit godt samarbeid mellom barnehagemynde og barnehageeigar. Med utgangspunkt i dei opplysingane kommunen får kjennskap til, skal barnehagemynde rettleie barnehageeigar og barnehagane til å følgje regelverket. Gjennom risikoanalysar og vurderingar skal ein bestemme kva tid det er føremålstenleg å gje rettleiing. 

Målet med rettleiing er å sikre etterleving av regelverk. Dersom rettleiing ikkje fører til endring, er det naudsynt å bruke tilsyn som verkemiddel. Tilsyn kan og gjennomførast utan at ein har prøvd rettleiing først.

For meir informasjon, ta kontakt med Gloppen kommune ved Grete Aa Sandal

Føresette har rett til å klage dersom dei meiner at barnehagen ikkje oppfyller pliktene sine etter barnehagelova eller forskrift. Vi oppmodar alltid at ein først tek opp spørsmål, bekymringar eller uenigheter direkte med dei som er nærast situasjonen – til dømes pedagogisk leiar eller styrar. Dei fleste saker kan løysast godt gjennom dialog og felles forståing.

Generelle problemstillingar som gjeld barnehagen sitt innhald, miljø eller samarbeid kan også takast opp i barnehagen sitt samarbeidsutval (SU). SU er eit rådgjevande organ der føresette, tilsette og eigar møtast for å drøfte saker av meir overordna karakter. Dette er ein god arena for å løfte fram tema som ikkje handlar om enkeltsaker, men om utvikling og kvalitet i barnehagen.

Dersom ein ikkje finn ei løysing i barnehagen, eller føresette ønskjer ei formell vurdering, kan saka sendast til Barnehagemyndigheita. Klaga skal vere skriftleg og skal beskrive kva saka gjeld, kva som er forsøkt løyst i barnehagen, og kva føresette ønskjer vurdert. Døme på tema du kan klage på: Utrygt psykososialt banehagemiljø, vanskeleg samarbeid med barnehagen, bemanningssituasjon.

Målet vårt er at alle barn skal få eit trygt og godt barnehagetilbod, og at føresette skal kjenne seg høyrde og tekne på alvor – både i enkeltsaker og i det vidare samarbeidet i barnehagen.

Send inn klage