Kapittel 1 - Innleiande reglar
§ 1 Formål
Retningslinjene skal medverke til auka rettstryggleik for søkjarane til kommunal bustad.
Retningslinjene skal legge til rette for at personar som fell inn under målgruppa skal få leige nøktern og eigna kommunal bustad.
§ 2 Verkeområde
Retningslinjene gjeldt bustader som Gloppen kommune disponerer for utleige til vanskelegstilte på bustadmarknaden.
Retningslinjene gjeld butilhøve som er knytte til avtale om bruksrett til husrom mot vederlag, jf. husleigelova § 1-1.
Retningslinjene gjeld ikkje opphald i institusjon eller i bustader med personale tilgjengeleg heile eller deler av døgnet. Retningslinjene gjeld heller ikkje midlertidig bustad/Akuttbustad som vert handsama av NAV etter Sosialtenestelova §27.
Kommunale bustader blir leigde etter føresegnene i § 11-1 i husleigelova.
§ 3 Målgruppe
Målgruppa for retningslinjene er personar som ikkje sjølve, eller ved hjelp av andre former for offentleg bistand, greier å skaffe seg eigen bustad.
Med vanskelegstilt på bustadmarknaden meina ein personar som ikkje kan ta i vare eigne interesser på bustadmarknaden, og difor treng bistand til å skaffe eller behalde eigen bustad, jf Lov om kommunenes ansvar på det boligsosiale feltet (boligsosialloven) §4.
Dette gjeld og personar som treng hjelp til å skaffe seg bustad på grunn av dårleg økonomi, nedsett funksjonsevne, helsemessige eller sosiale problem.
§ 4 Kommunal bustad for vanskelegstilte
Kommunal bustad for vanskelegstilte er dei bustadene kommunen disponerer, både eigne og dei som er skaffa til utleige for målgruppa. Kommunen sine bustader for vanskelegstilte er:
- Bustader for fyrstegangsbusetting av flyktningar
- Bustader for helsemessig, sosialt og økonomisk vanskelegstilte
- Bustader for personar med rus og psykiske lidingar
- Andre utleigebustader.
Kapittel 2 - Grunnkrav for å leige kommunal bustad
§ 5 Noverande butilhøve
Søkjar må vere utan eigna bustad og trenge hjelp til å skaffe seg bustad eller vere i ferd med å bli utan eigna*) bustad.
Søkjar er i ferd med å bli utan eigna bustad dersom:
- Leigekontrakt går ut innan seks månader utan at søkjar har rett på fornying
- Søkjar ikkje har bustad ved utskriving frå institusjon eller liknande bu-tilbod og utskriving vil skje innan seks månader
- Søkjar sin noverande bustad ikkje er eigna
*)Med “ikkje eigna” meinar vi her at søkjar for eksempel kan ha varig nedsett funksjonsevne eller andre helsemessige årsaker. Eller bustaden sin tilstand.
§ 6 Kriteriet/vilkår for tildeling av kommunal bustad
Å skaffe seg bustad er i utgangspunktet eit privat ansvar, og kommunal bustad er ikkje ein lovfesta rett. For å kvalifisere for kommunal bustad, må søkjar ha prøvd å skaffe eller behalde bustad på eigenhand. For eksempel på privat leigemarknad.
Dersom søkjar har fast inntekt, eigedom, formue eller andre moglegheiter til å skaffe eigen bustad, er det forventa at søkjar sjølv kan skaffe bustad, da kommunen prioritera vanskelegstilte som ikkje har det nemnte.
Søkjar må:
- Vere fylt 18 år på søknadstidspunktet, det kan gjerast unntak under særskilte forhold- på søknadstidpunktet ha lovleg opphald i Noreg og vere registrert i folkeregisteret med adresse i Gloppen kommune siste året, eller ha anna nær tilknyting til kommunen.
- Vere utan eigna bustad, sjå § 5
- Vere i målgruppa for kommunal bustad, sjå § 3
- Sjølv ha forsøkt å skaffe seg eigen bustad.
Vilkår om butid gjeld ikkje for flyktningar som skal busettast i Gloppen kommune for fyrste gong etter avtale mellom staten og Gloppen kommune.
Oppfylling av tildelingskriteria medfører ikkje ein automatisk rett til kommunal bustad.
§ 7 Søkjarar med behov for oppfølgingstenester
Det må påreknast at søkjar kan meistre busituasjonen med dei forpliktingar som høyrer til, eventuelt ved hjelp av tilgjengelege oppfølgingstiltak eller hjelpetiltak.
Hjelpetiltak som er vurderte som nødvendige for at søkjar skal meistre busituasjonen, skal spesifiserast og leggast fram for søkjar til uttale og godkjenning før dei vert tekne inn som vilkår i eit positivt vedtak. Aksepterte hjelpetiltak vert grunnlag for ein samarbeidsavtale mellom søkjar og
kommunen.
Dersom søkjar ikkje ynskjer å nytte seg av tilbodne hjelpetiltak som er vurdert å vere nødvendige for å meistre busituasjonen, vert det avslag på søknaden om bustad.
§ 8 Inntekt og formue
Søkjar må ikkje ha inntekt eller formue som gjer at søkjar sjølv er i stand til å kjøpe seg eigna bustad.
§ 9 Uoppgjord gjeld til Gloppen kommune
Dersom søkjar har uoppgjort gjeld til Gloppen kommune som følgje av tidlegare butilhøve, kan det stillast vilkår om at det blir inngått betalingsavtale for gjeld før søknaden vert behandla. Uoppgjord gjeld kan vere skuldig husleige, mishald av kommunale lån eller manglande skadeerstatning frå
tidlegare leigetilhøve.
Dersom det ikkje kjem i stand betalingsavtale, kan det bli avslag på søknaden om leige av kommunal bustad.
Kapittel 3 - Prioritering mellom søkjarar som fyller grunnkrava
§ 10 Prioritering
Er talet søkjarar som fyller grunnvilkåra i retningslinjene §§ 5-9 større enn samla tal kommunale bustader til disposisjon, skal det gjerast ei prioritering mellom kvalifiserte søkjarar. Ved prioritering skal det leggast vekt på dei ulike behova hjå dei kvalifiserte søkjarane og kva type bustader som er
tilgjengelege.
Søkjarar som etter ei samla vurdering har det mest påtrengande bustadbehovet, skal prioriterast.
Søkjar som ikkje når opp i prioritering samanlikna med andre søkjarar, skal få avslag. Dei som har fått avslag, skal få tilbod om individuelt tilpassa bistand jamfør lov 20.desember 2022 nr 121 om kommunens ansvar på det boligsosiale feltet (boligsosialloven § 6 )
Kapittel 4 – Sakshandsaming
§ 11 Søknad
Søknad om leige av kommunal bustad skal sendast til Gloppen kommune, Busetting og integrering
§ 12 Vedtak
Vedtaket etter desse retningslinene er eit enkeltvedtak etter forvaltningslova § 2 med klagerett etter forvaltningslova § 28. Forvaltningslova sine reglar om sakshandsaming av enkeltvedtak gjeld for søknadene.
Vedtak om leige av kommunal bustad skal innehalde kva bustad og type bustad som er tildelt, lengde på leigekontrakt, husleige og eventuelle vilkår om at søkjar inngår betalingsavtale for gjeld i samsvar med § 9 i retningslinjene.
Når avtale om oppfølgingsteneste i tilknyting til bustaden er nødvendig, skal det gå fram av vedtaket, sjå § 7 i retningslinjene.
§ 13 Leigetid
Vedtaket skal som hovudregel gje søkjar rett til ei tidsbestemt leigeavtale på 3 år.
§ 14 Bortfall av positivt vedtak om leige av kommunal bustad for vanskelegstilte
Vedtak om tildeling av bustad er ikkje gjeldande dersom brukar takkar nei til tilbod om bustad.
Vedtaket kan og sjåas som ugyldig dersom
- søkar sin situasjon har endra seg slik at han / ho ikkje lenger fyller grunnkrava ved inngåelse av leigekontrakt.
- det vert lagt fram dokumentasjon på at vedtaket bygger på feilaktige opplysningar som vert vurdert å ha betydning for at kommunal bustad vart innvilga. Eventuelt at leigetakar ikkje tek imot hjelp og rettleiing jf. §7.
- vedtak om leige av kommunal bustad fell bort etter § 14 i retningslinjene, skal det gjerast eige vedtak om det.
§ 15 Fornying av vedtak
Dersom leigetakar ikkje har klart å skaffe eigen bustad innan utgangen av kontraktsperioda må leigetakar søke på nytt om kommunal bustad. Dette må gjerast innan 2 månadar før noverande kontrakt går ut.
Søknaden vert då vurdert ut frå dei ordinære grunnkrav og prioriteringar som for tildeling av bustad. Jf. § 5-9 i gjeldande retningslinjer.
Søknaden kan bli avslått dersom det føreligg uoppgjord gjeld til kommunen i samsvar med retningslinjene § 9 og det ikkje er inngått nedbetalingsavtale for gjelda.
Ved fornying av positivt vedtak skal det vurderast om søkjar skal tildelast annan bustad tilpassa
husstanden sin noverande situasjon.
§ 16 Byte av kommunal bustad
Leigetakarar av kommunal bustad kan søkje om å få byte til annan bustad.
Vilkår:
- Bustaden er ueigna på grunnlag av helsemessige årsaker
- Det er endring i husstanden sin storleik
- Bustaden er ueigna på grunnlag av andre tungtvegande sosiale tilhøve.
Det vert vektlagt at kommunal bustad skal vere ein nøktern bustad og det vert nøye vurdert om vilkåra for byte av bustad er oppfylte.
§ 17 Brukarmedverknad
Gloppen kommune skal i sakshandsamingsprosessen legge til rette for at søkjar og husstandsmedlemmar skal få uttale seg om sine behov, for eksempel til størrelse på bustad, plassering og andre forhold som kan påverke trivsel i bustaden. Søkjar skal og få bistand til å innhente dokumentasjon som kan være relevant for sakshandsaming. Eksempel på dette kan være dokumentasjon frå lege, skule eller andre instansar dersom vedkomande ber om det.
§ 18 Barnets beste
For søkjarar som har omsorg for barn, skal det i behandling av søknaden takast omsyn til barnets behov for stabilitet, bu-miljø, helsemessige behov, helsemessige behov og fysisk utforming. Behov for å kunne fortsette på same skule/barnehage eller andre forhold som er til barnets beste.
§ 19 Klage
Klageorgan for vedtak gjort etter desse retningslinjene er særskilt klageorgan i personsaker, Gloppen kommune.
Klage sendast inntaksnemnda for kommunale bustadar, Grandavegen 9 6823 Sandane. Dersom inntaksnemnda for kommunale bustadar opprettheld vedtaket skal det sendast Særskilt klageorgan i personsaker, Gloppen kommune.
Klagefrist er tre veker frå det tidspunkt brev om vedtak kom fram til søkjar, jf § 29 i forvaltningslova.